पत्रकारितामा ओखलढुङ्गाको योगदान अविष्मरणीय रहेको चर्चा गर्दै ओखलढुङ्गा पत्रकार समाजकाे प्रथम साधारणसभा सम्पन्न

काठमाडौँ । ओखलढुङ्गा पत्रकार समाजले आफ्नो प्रथम साधारणसभा तथा ‘ओखलढुङ्गाको पत्रकारिताकाे वर्तमान अवस्था’का बारेमा विमर्श कार्यक्रम गरेको छ । नेपाल पत्रकार महासङ्घ केन्द्रीय कार्यालयको सभाहलमा शनिवार ओखलढुङ्गा घर भई काठमाडौँमा बसेर विभिन्न मिडियामा काम गर्ने पत्रकारबिच भएको उक्त कार्यक्रममा जिल्लाको पत्रकारिताको इतिहासदेखि वर्तमान अवस्थाका बारेमा समेत चर्चाभयो ।

प्रमुख अतिथि वरिष्ठ पत्रकार एवम् प्राध्यापक पुरुषोत्तम दाहालले पत्रकारिता सधैँ सिक्ने विषय भएकाले यसको अभ्यास जति गर्यो, त्यति नै निखार आउने बताए । ‘पत्रकारले अन्तिम सास हुँदासम्म स्वतन्त्रता खोज्छ’, उनले भने ‘पत्रकार स्वतन्त्रताका अभियन्ता हुन्, पत्रकारितालाई निष्ठापूर्ण बनाउनु पर्छ तर त्यो कुरा कठिन कुरा हो । स्वतन्त्रताको अनुुभूति हराएका दिन पत्रकारिता पनि मर्छ ।’ ओखलढुङ्गा पत्रकार समाजका सल्लाहकार समेत रहेका दाहालले संस्थाले कुुनै एउटा क्षेत्रमा केन्द्रीत भएर आफ्ना कार्यक्रमहरू अघि बढाएको खण्डमा चाँडै सफलता पाउने सुुझाव दिएका छन् ।

विशिष्ट अतिथि एवम् प्रेस काउन्सिलका पूर्वअध्यक्ष राजेन्द्र दाहालले नेपालको साहित्य र पत्रकारिताको राष्ट्रिय विकासमा ओखलढुङ्गाका पत्रकारको महत्त्वपूर्ण योगदान रहेको बताए । माटो प्रति कसैको वैरभाव र निरपेक्ष नहुने सन्देश कार्यक्रममा सहभाीहरूको प्रस्तुतिले प्रष्ट्याएको भन्दै उनले ओखलढुङ्गाका पत्रकारहरूको साझा संस्थाका रूपमा ओखलढुङ्गा पत्रकार समाजलाई अघि बढाउनुपर्ने सुुझाव दिए । नेपालको पत्रकारितामा विसं. २०३० देखि २०५० को अवधिमा वरिष्ठ पत्रकार होमनाथ दाहालको योगदान विशिष्ट रहेको उल्लेख गरे ।

विशेष अतिथि,सल्लाहकार तथा नेपाल पत्रकार महासङ्घकी निवर्तमान कार्यबाहक अध्यक्ष बाला अधिकारीले संस्थालाई बलियो बनाउन विभिन्न निकायहरूसँगको सहकार्यमा कार्यक्रमहरू गर्नुपर्ने बताइन् । उनले पत्रकारिताको विकासमा जहाँ रहेपनि ओखलढुङ्गाको विशेष भूमिका रहेको चर्चा गर्दै नेपाल पत्रकार महासङ्घको केन्द्रीय कार्यबाहकको हैसियतमा आफूले निर्वाचन सम्पन्न गराउँदाको अनुभव र पत्रकारिताका विविध पक्षबारे आफ्नो दृष्टिकोण प्रस्तुत गरिन् ।

ओखलढुङ्गा पत्रकार समाजका उपाध्यक्ष एवम् गोरखापत्रका डिजिटल प्रमुख नारदमुनि गौतमले ‘ओखलढुङ्गाको पत्रकारिताको इतिहास र वर्तमान अवस्था’ विषयक कार्यपत्र प्रस्तुत गर्दै ओखलढुङ्गाबाट मौखिक तथा हस्तलिखित साहित्य एवम् पत्रकारिता सुरुभएदेखि यताको डिजिटल युगसम्मको अवस्थालाई प्रस्तुत गरेका छन् । उनले नेपालमा दर्ता भएको पहिलो हस्तलिखित साहित्यिक पत्रिका ‘जूनकिरी’ देखि वर्तमान पत्रकारिताको अवस्था समेतको चर्चा गरे ।उनले युगकवि सिद्दिचरण श्रेष्ठ सम्पादक रहेको ‘अावाज’ दैनिक पत्रिका दैनिक पत्रकारिताको इतिहासमा पहिलो रहेको उल्लेख गरे । प्रेमनारायण प्रेमीद्वारा सम्पादित दैलो साहित्यिक पत्रिकाले ओखलढुङ्गाको साहित्यिक पत्रकारितामा आशाको दियो जगाएको उल्लेख गरे ।उनले पत्रकारिताको सबैभन्दा लामो र व्यावसायिक अभ्यास गर्ने ओखलढुङ्गाका पत्रकार होमनाथ दाहाल रहेको र स्थानीयदेखि केन्द्रसम्मै ओखलढुङ्गाका पत्रकारको वर्चस्व रहेको चर्चा गर्दै आगामी दिनमा यस बारे अनुसन्धानात्मक कृति प्रकाशन गर्ने बताए ।

त्यसैगरी कार्यक्रमका अतिथि एवम् वरिष्ठ पत्रकार बालकुमार नेपालले ओखलढुङ्गाको पत्रकारिताको इतिहास र अग्रजका योगदानको उचित मूल्याङ्कन गर्दै अघि बढ्न जोड दिए। अतिथि एवम् अधिवक्ता हरिप्रसाद ढुङ्गेलले आफूले लामो समयसम्म पत्रकारिता गरेको अनुभव सुनाउँदै अहिले सक्रिय पत्रकारितामा नरहे पनि समाजलाई सहयोग गर्ने बताउँदै पत्रकारितालाई आफूले छाडिनसकेको बताए ।

अतिथि एवम् अनलाइन पत्रकार समाजका अध्यक्ष शिव सत्यालले संस्था सञ्चालनका लागि कोष व्यवस्थापन चुनौतीपूर्ण रहेको चर्चा गर्दै न्यु मिडियाका बारेमा धारणा राख्नुभएको थियो ।

समाजका उपाध्यक्ष सलोजा दाहालले स्वागत मनतव्यका क्रममा ओखलढुङ्गाबाट काठमाडौँ उपत्यकामा आइ विभिन्न मिडियामा कार्यरत पत्रकारलाई एकताबद्ध गर्दै अघि बढ्ने बताइन्।

यसैगरी समाजका सदस्य विनोद दाहालले धन्यवाद ज्ञापन गर्दै ओखलढुङ्गाको पत्रकारितालाई अघि बढाउन समाज कोशेढुङ्गा साबित हुने बताए ।

समाजका सदस्य टीकादास श्रेष्ठले ओखलढुङ्गा पत्रकार समाजको सदस्यता प्रदान र साङ्गठनिक विधि र प्रकृयाबारे आफ्नो धारणा राखे । यस‌ै क्रममा समाजका सदस्य कुम्भराज राईलगायत नारायण घिमिरे, सुमन लुइँटेल आदिले आआफ्नो धारणा राखे ।

साधारणसभाको समापनका क्रममा समाजका अध्यक्ष चेतनाथ धमलाले संस्थालाई बलियो बनाउन आगामी वार्षिक कार्यक्रम बनाएर कार्यान्वयन गर्ने प्रतिबद्धता व्यक्त गरेका छन् । उनले ओखलढुङ्गाको पत्रकारिता संस्थागत वा व्यक्तिगत रूपमा गौरवमय रहेको चर्चा गर्दै इतिहासमा भएका विशेष योगदानको सम्मान गर्दै अघि बढ्ने बताए । उनले कसैसँग भैरभाव र आक्षेप नरहेकाले ओखलढुङ्गा पत्रकार समाज खोजअनुसन्धान गर्दै अघि बढ्ने र विशेष कार्यक्रमहरू ल्याउने बताए । निकट भविष्यमा प्रकाशित हुने समाजको मुखपत्रका लागि लेख रचना उपलब्ध गराउन समेत आग्रह गरे।

कार्यक्रमको उद्घोष गर्दै ओखलढुङ्गामा जन्मेर काठमाडौँ उपत्यका तथा अन्य स्थानमा पत्रकारिता गर्दै आएका पत्रकारहरूलाई एकताबद्ध गर्दै जिल्लाको पत्रकारितालाई अझ बलियो बनाउन सामूहिक प्रयत्न गर्ने उद्देश्य रहेको ओखलढुङ्गा पत्रकार समाजका महासचिव जीवन शर्माले बताए ।

साथै महासचिव जीवन शर्माले प्रस्तुत गरेको साङ्गठानिक प्रतिवेदन र कोषाध्य जानुका बरालले प्रस्तुत गरेको आर्थिक प्रतिवेदन सुझावसहित पारित भयो। साधारणसभामा आगामी वर्षका नीति तथा कार्यक्रमका बारेमा  छलफल सहित पारित भयाे ।

साधारणसभामा युवराज पहाडी, सुमन लुइँटेल, नारायण घिमिरे, गोविन्द गिरी, मदन कोइराला, चित्रकुमार वाग्ले, लिलाबहादुर श्रेष्ठ, सरोज पौडेल, श्याम राई, कुम्भराज राई, शिव सत्याल, राजन न्यौपाने, शिव बिक (मिलन), पुण्यप्रसाद वाग्ले, चन्द्र वाम्बुले, सरोज ढुङ्गेल, शर्मिला थापा, लोचन खतिवडा, खिलानाथ दाहाल, अर्जुन खतिवडा, कृष्णजित राई, होमशङ्कर बास्तोला, टेकबहादुर खड्गा, पेशलकुमार खतिवडा लगायतका ४ दर्जनजति पत्रकारको उपस्थित रहेकाे थियाे ।

समाजको प्रथम साधारणसभा , सदस्यता प्रदान र ‘ओखलढुङ्गाको पत्रकारिता र वर्तमान स्थिति’ विषयक विमर्श एकसाथ सम्पन्न भयो । सहभागी पत्रकार वक्ताहरूले ओखलढुङ्गेली पत्रकारिताको योगदान अविष्मरणीय र अनुकरणीय रहेको चर्चा गरेका थिए  ।