काठमाडौं । वरिष्ठ आख्यानकार इन्द्रकुमार श्रेष्ठ सरित्को लघुकथासङ्ग्रह ‘एकमुठी घाम’ को प्रतिनिधिसभाका सांसद एवम् पूर्वमन्त्री तथा कार्यक्रमका प्रमुख अतिथि माननीय रघुजी पन्तले विमोचन गरेका छन् । सुभाना मिडियाको आयोजनमा मङ्गलबार पुतलीसडकको सहारा क्याफेमा भएको भव्य कार्यक्रममा अख्यानकार सरित्लाई सुभाना आख्यान सम्मान–२०८१ द्वारा सम्मान गरिएको छ ।
विमोचन पश्चात कार्यक्रमलाई सम्बोधन गर्दै पन्तले साहित्यकार सरित्को रचनाहरू फुटकर रूपमै भए पनि आफूले प्रशस्त अध्ययन गर्दै आएको र आज विमोचित कृतिमा युग चेतना र समय चेतना प्रवलरूपमा रहेको बताउँदै आगामी दिनमा स्रष्टाबाट अझ उत्कृष्ट कृति नेपाली साहित्यले पाउने विश्वास पनि व्यक्त गरेका छन् ।
साहित्यकार दिल पौडेलको अध्यक्षतामा भएको उक्त विमोचन एवम् विमर्श कार्यक्रममा प्राडा गोपीन्द्र पौडेल, डा. शैलजा पोखरेल, डा. रमेश शुभेच्छु, कथाकार नारायण तिवारी र डा. पुष्करराज भट्टले मन्तव्य व्यक्त गरेका थिए ।
मन्तव्यका क्रममा प्राडा पौडेलले विमोचित कृतिका स्रष्टा सरित् बहुमुखी प्रतिभाका धनी स्रष्टा भएको र उनी विशेषत नेपाली साहित्यमा आख्यान लेखनमा अग्रणी रहेको र अब लघुकथा लेखनमा पनि उनको आगमन हुनु सुखद् रहेको कुरा बताए । अन्य वक्ताहरूले पनि सरित्को करीब पाँच दशक लामो साहित्य साधनाको बारेमा प्रकाश पार्दै विमोचित कृतिले वर्तमान भ्रष्ट राजनीतिलाई उधिनेको उल्लेख गरेका छन् ।
विमोचित कृति ‘एक मुठी घाम’ लघुकथाका स्रष्टा इन्द्रकुमार श्रेष्ठ सरित् स्वयम्ले पनि आफ्नो साहित्यिक यात्रा र उक्त कृति तयार पार्दाका आफ्ना अनुभवलाई सुनाए ।
कार्यक्रमका आयोजक सुभाना भिडिया प्रालिका प्रबन्ध निर्देशक एवम् पत्रकार शिव विक ‘मिलन’ले स्वागत मन्तव्य राखेका थिए भने साहित्यकार अच्युत घिमिरेले धन्यवाद ज्ञापन गरेका थिए । स्रष्टा इन्द्रकुमार श्रेष्ठ सरित् बहुआयामिक व्यक्तित्वको बारेमा प्रकाश पार्दै प्राज्ञ चेतनाथ धमलाले अत्यन्त रोचक ढङ्गले कार्यक्रमको सञ्चालन गरेका थिए ।
कार्यक्रममा प्रमुख अतिथि पन्तले सुभाना मिडिया प्रालिको तर्फबाट साहित्यकार इन्द्रकुमार श्रेष्ठ सरित्लाई ‘सुभाना आख्यान सम्मान–२०८१’ बाट सम्मान गरेका थिए ।
