काठमाडौँ । नेपाली कांग्रेसभित्र आन्तरिक सहमति जुट्न नसक्दा प्रतिनिधिसभाअन्तर्गत संसदीय दलको नेता चयन प्रक्रिया स्थगित गरिएको छ। निर्वाचनका लागि सबै तयारी पूरा भइसकेको अवस्थामा अन्तिम समयमा आएर प्रक्रिया रोकिनुले पार्टीभित्रको मतभेद सतहमा आएको देखिएको छ।
निर्वाचन तालिका सार्वजनिक भइसकेको थियो र आजै मतदान हुने तयारी थियो। तर शीर्ष नेताहरूबीच सहमति नजुटेपछि प्रक्रिया तत्कालका लागि रोकिएको निर्वाचन समिति सदस्य मुना भुसालले जानकारी दिइन्। नयाँ मिति भने अझै तय गरिएको छैन।
सहमति खोज्ने प्रयासस्वरूप उपसभापति विश्वप्रकाश शर्माको नेतृत्वमा सात सदस्यीय समिति गठन गरिएको छ। समितिमा पुष्पा भुसाल, प्रदीप पौडेल, गुरुराज घिमिरे, प्रकाश रसाइली ‘स्नेही’, मुना भुसाल र राजु कटुवाल रहेका छन्।
दलको नेतृत्व चयनमा सभापति गगनकुमार थापा र उपसभापति विश्वप्रकाश शर्माबीच मुख्यतः मतभेद देखिएको छ। थापाले रसुवाबाट निर्वाचित मोहन आचार्यलाई अघि सारेका छन् भने शर्माले समानुपातिक सांसद भीष्मराज आङ्देम्बेलाई समर्थन गरेका छन्।
यसैबीच, अर्जुननरसिंह केसीले पनि सहमति नभए आफू चुनाव लड्ने संकेत दिँदै प्रतिस्पर्धालाई थप रोचक बनाएका छन्।
निर्वाचनको विस्तृत कार्यतालिका समेत सार्वजनिक भइसकेको थियो—उम्मेदवारी दर्तादेखि मतदानसम्मका सबै चरण आजै सम्पन्न गर्ने योजना थियो। तर सहमति अभावका कारण अन्तिम समयमा आएर प्रक्रिया नै रोकिएको छ।
यस घटनाले कांग्रेसभित्र नेतृत्व चयन प्रक्रिया अझै जटिल बन्ने संकेत दिएको छ। अब गठन गरिएको समितिले सहमति जुटाउन सक्छ कि प्रक्रिया फेरि प्रतिस्पर्धात्मक रूपमा अघि बढ्छ भन्ने चासो बढेको छ।
