एजेन्सी । चीनमा फैलिएको कोरोना भाइरसजस्तै मानिने ह्यूमन मेटान्युमोभाइरस (एचएमपीभी) भारतमा पनि देखिन थालेको छ।
पछिल्लो पटक गुजरातको अहमदाबादमा दुई महिने शिशुमा यो भाइरस पाइएको हो। यसअघि, कर्नाटकमा तीन महिनाको बालीका र आठ महिनाको बालकमा यो भाइरस पुष्टि भएको थियो।
भारतको केन्द्रीय स्वास्थ्य मन्त्रालयका अनुसार कर्नाटकका दुई बालबालीकाहरु नियमित स्वास्थ्य परीक्षणका लागि अस्पताल गएका थिए। परीक्षणपछि उनीहरूमा एचएमपीभी पुष्टि भएको हो।
यध्यपि कर्नाटक स्वास्थ्य विभागले भने बच्चाहरूको नमुना निजी अस्पतालमा परीक्षण गरिएकाले सरकारी प्रयोगशालामा पुष्टि नभएको जानकारी दिएको छ।
अहमदाबादस्थित ओरेन्ज अस्पतालका डा. नीरव पटेलका अनुसार, ‘दुई महिने शिशुलाई १५ दिनअघि गम्भीर अवस्थाका कारण अस्पताल भर्ना गरिएको थियो। शिशुलाई चिसो र उच्च ज्वरो थियो। पाँच दिनसम्म भेन्टिलेटरमा राखेर उपचार गरिएको थियो। त्यसपछि परीक्षण गर्दा एचएमपीभी पुष्टि भयो।’
कर्नाटकका मुख्यमन्त्री सिद्धारमैयाले यो भाइरस पुष्टि भएपछि स्वास्थ्य मन्त्री दिनेश गुन्डु रावसँग छलफल गरेका छन्। उनले सरकारले भाइरस नियन्त्रणका लागि सबै उपाय गर्ने बताए।
